每逢禮拜五，一班打工仔都會想快啲收工享受周末，不過身為上司就無咁好彩，可能連Happy Friday都要用嚟開會喇。絲絲就聽聞內地幾位有分量嘅IT界領袖上禮拜五（22日）喺阿里巴巴總部聚首，開咗個閉門會議喎。
一位自稱係阿里巴巴員工嘅網民喺微博發布咗兩張相，相中人正係阿里巴巴、百度、騰訊控股（00700）、優酷土豆等公司嘅高層，百度同騰訊嘅高層代表，仲係CEO李彥宏及馬化騰。唔講唔知，呢幾位高層夾埋掌控緊市值同估值接近15,000億港元嘅IT界龍頭公司o架，難怪呢兩張相引起咁多人注意。
畢竟依家內地嘅資訊產業咁發達，呢幾間公司嘅產品使用頻率更加拍得住Facebook同Google，見到一班高層聚埋一齊開會，大家自然想知道佢哋講咩啦。
但據絲絲所知，呢個閉門會議似乎無咩特別，只係一個由「華夏同學會」舉辦嘅聚會。話說呢個同學會係由長江商學院同中歐國際商學院兩間學校嘅校友組成，成員都係一班傑出嘅商界領袖，佢哋會輪流去對方嘅辦公室聚會，今次就咁啱去到阿里巴巴CEO馬雲個辦公室。