Market Insight：光大國際耐心等收成

儘管塞國政府讓步將細額存戶的稅率降低，前晚存款稅，變相入股銀行的提案，仍然以36人反對，19人棄權加1人缺席的大比例下不獲通過。歐洲人眼中自身利益，仍然高於整個國家經濟，甚至整個歐元聯盟的財政穩定性上，但歐元區股市對消息反應唔算負面，事緣俄羅斯總統普京可能向塞國提供援助，債務延期五年。

歐央行被睇穿底牌

俄國肯出手，事關塞國銀行體系中的700億美元存款，近300億美元來自俄羅斯，變相被挾持財產唔幫唔得，講到底都係錢作怪。

放大圖片

放大圖片

再者，經歷去年救助希臘的經驗，大家心中有數，亦都睇死歐洲央行只係「鱷魚頭，老襯底」，歐盟窮兄弟就算再賴皮，佢都係唔會踢佢出局，最後乖乖出嚟埋單，塞浦路斯危機最多只不過係一次基金震倉演習。

農曆新年之前，成功預言A股短期進入調整期，被中港兩地股民視為神級技術分析大師的Tom DeMark，前晚出嚟唱A股見底，加埋大摩分析員預測，港股最樂觀情況到一五年可見50,000點！

獨弱的港股氣氛一百八十度轉向，昨日恒指升214點報22,256點，儘管沽空佔大市成交比例，由10.06%升至12.15%，係去年八月底以來最勁，不過三月期指成交大增，估計同淡友收夠籌，開始冚倉有關。

港股大牛市話咁易？

大摩睇港股見50,000點的亞洲策略報告，內容其實無太大新意，股市反應咁大，同一來本身已超賣到極，市場等一個買入訊號。報告理據主要圍繞中國經濟增長，恒指周期每6至8年出現一次高位的特質，以及歷史估值，去預測港股一五年底前可以去到38,800至50,000點。

本欄曾提過，過去二十年港股市帳率介乎1至3.5倍之間運行，平均及中位值分別係1.9及1.88倍，以恒指22,256點，相當於1.46倍市帳率，屬於一個中游至偏低水平內。套用一九九三、一九九九及二○○七年高位的3.3至3.5倍市帳率，以歷史估值推算，恒指下次高峰升至50,304至53,353點的機會的確存在，問題是，未來兩年要甚麼催化劑，使股市重演上述三次超級牛市的環境呢？

昨日的報復式反彈，除航運股較弱外，幾乎雞犬皆升。兩會期間中央用相當篇幅提出環保改善工程，早在「十二五」規劃，國家提出要扶持垃圾處理行業，偏偏港股選擇唔多，最具規模有番咁上下往績支持的只有光大國際（00257）。

早前大市下跌，光國股價跌幅遠比其他兩會概念股輕微，由近期高位5.7元跌13%至4.95元，上星期已率先由低位反彈，昨收報5.47元升0.17元。

家電股宜準備食胡

光國去年賺11.23億元，撇除出售青洲大橋收益，實際核心盈利8.81億元，相對220億元市值，或者有保守投資者嫌貴，事實目前光國唔少項目仍在籌備及建造階段，隨着濟南、蘇州、鎮江與宿遷項目投產，利用率改善，未來兩三年光國業績增長可期。

今次兩會，講到底多少有反高潮味道，唔少概念股唔對辦，弱市中跌唔落，光國睇嚟後市可以睇高一線。

呢期唔少中資企業公布業績，部分交得出成績嘅股份有資金吸納，好似海爾電器（01169）公布完業績之後，股價止跌回升，昨日高位見12.68元，收報12.56元，升7%。同屬家電股的創維數碼（00751）及TCL多媒體（01070）則分別升4.6%及2.1%。

由於家電股板塊有唔少基金坐貨，唔排除月底季結前股價表現會繼續靠穩，已成功上車博反彈者，宜好好把握獲利機會。

古勝