絲絲每次追完一套好睇嘅劇集，都會好期待有電影版睇，相信製作團隊一樣想乘勝追擊，之不過好多時都籌集唔夠資金。
其實透過科水網站，向一眾劇迷集資咪得囉！千祈唔好睇小網絡集資嘅科水能力呀，○四至○七年大熱美劇《美眉校探》製作人，喺美國科水網站Kickstarter，用咗短短10個鐘頭就籌到200萬美元資金，準備將劇集搬上大銀幕啦。
科水網站Kickstarter提供平台畀藝術創作項目向大家籌募捐款，成立短短三年，已經為超過3萬5千個藝術項目，籌到超過5億美元資金，連今屆奧斯卡最佳紀錄短片 《Inocente》都係透過網站，籌到過5.2萬美元。
《美眉校探》製作人咁快就籌到咁多錢，全靠一班劇迷齊齊出錢支持。雖然有份捐錢嘅劇迷冇股份收，但都會收到電影DVD、劇本副本、T恤呀，甚至會喺電影謝幕度見到自己個名添，咁當然視乎劇迷科咗幾多水啦。
余詩韻