港交所（00388）一眾高級行政人員，去年度花紅連同獎授股份「袋袋平安」，但港交所主席同一班非執董就冇咁好彩，港交所尋日出咗今年股東會嘅通告，主席同一班非執董統統冇人工加。記得去年股東會，主席全年人工由前年嘅55萬元，增加到90萬元；非執董就由前年嘅38.5萬元，加到60萬元。
雖然主席同非執董今年人工升幅跟唔上通脹，但做港交所董事係身份象徵，又有社會地位，佢哋應該唔會介意嘅。
不過，今年股東會仍然有「新嘢」，將會首次採用電子投票系統，股東到時會獲發一部手提鍵盤同個人智能卡，即時按鈕投票。好處係唔使好似以前咁畀張紙股東投票，然後再慢慢點票，而係可以即時知道投票結果。
呢個電子投票系統，喺外國好普及，但香港就較少用，印象中，只有港鐵（00066）、普拉達（01913）同友邦（01299）等採用過，真係一隻手都數得晒。梗係啦，要成本喎，但港交所係大公司，又多散戶股東，講公眾利益，都要做吓模範嘅！