建銀國際高級分析師余君峻（Kenneth）話得到高人指點，尋日已經拎咗行街紙，正式改名做余啟正，大家下次見到佢時要改口喇！
起初絲絲知道佢要改名，絲絲仲以為只係fine tune吓，估計都係由「峻」改做「俊」，或者係「竣」之類。
點知原來係大改，改做「啟正」。雖然Kenneth已經改咗名，絲絲硬係覺得「君峻」型啲，哈哈，下次見到佢希望唔會口快快叫咗佢個舊名啦！
嗱，改名呢家嘢，無非係想改吓運，士途好啲、家庭運好啲，最好就係桃花運，同財運都有所改善。至於結果係點，又真係無人知，真係信不信由你，反正絲絲都信了！
絲絲只係覺得奇怪，Kenneth明明喺外國浸過吓鹹水，之後先返香港做嘢，好哋哋又做咩要改名呢？
原來佢話得到高人指點，詳細原因就無透露喇，只係笑笑口話「總之我就信咗啦」！聽講，佢今日已經拎咗行街紙，處理埋其他證件嘅改名手續，就正式大功告成喇！