依家科技發達到不能想像，行出街，人人都拎住部智能電話、平板電腦，要搵番啲集體回憶、有特色嘅舊式產物，真係分分鐘要去博物館先會見到，不過尋日絲絲就咁啱見到一樣好耐無見嘅物品，就係算盤喇！
剛上市嘅靄華押業（01319）送畀港交所（00388）嘅禮物係白玉算盤，而唔係當票。
送算盤好啱主題o架，睇電視睇得多，高高在上嘅「朝奉」，好多時都會用算盤計吓，你件貨值幾多錢，舊時個個都識打算盤，家陣就算你想學，都要周圍去搵師傅教你！
「二叔公」靄華話晒係史上第八、今年嘅「超購王」新股，加上當舖有佢神秘嘅一面，所以掛牌咁大件事，就吸引咗絲絲去八吓。
靄華係本港第一間上市嘅典當股，掛牌儀式場面熱烈，大股東陳氏成個家族都嚟齊晒，主席兼行政總裁陳啟豪個爸爸、即係靄華創辦人陳策文都有現身，絲絲見佢全程笑到見牙唔見眼，話晒親手「湊大」嘅終於「出人頭地」，咁梗係開心o架啦，佢仲同陳啟豪拖住手影咗張「勝利相」添。