孖妹S檔案：貴舖當道股票行租殃

訊匯愛地舖人流夠旺

沈：訊匯證券行政總裁沈振盈

彩兒： 訊匯證券旗下分行全是地舖，租金壓力不容小覷！

　沈： 係呀，目前雖以荃灣分行的租金最平，但組約將於年內到期，加租壓力即將埋身，依家仲未估到會加幾多！其實，我們偏好地舖，可較容易吸引街坊幫襯，但若加幅太惡，就惟有轉做樓上舖！

彩兒： 聽某位證券界朋友講，荃灣商廈的租金大幅加咗五成，佢最終要忍痛cut舖！

　沈： 老實講，四間舖之中，旺角分行的租金最貴，但該區唔夠客源，家陣直頭蝕緊錢，好彩觀塘區的生意甚佳，不乏捧場多年的街坊，才可拉上補下！不過，即使旺角間舖入不敷支，但該區人流如鯽，可當畀廣告費！

彩兒： 究竟要做幾多生意先夠交租㗎？

　沈： 隨着交易佣金不斷下調，主要收入來源已轉至孖展利息收入。整體計，我哋一年要做6億元生意額先可以打個和，所以依家做證券行只有兩條路可走，一係做大個餅爭取市場佔有率以倍大利潤，一係就縮細規模來減輕皮費！唉，以前好景就話可以「好天斬埋落雨柴」，但現已冇呢支歌仔唱喇，好似舊年平均得三、四百億成交額，不少行家搵唔到食之餘仲要面臨加租壓力，點捱呀！

彩兒： 去年行頭好曳，我哋經常聽到證券行放盤的消息！

　沈： 的確有好多人放盤，甚至平到百多萬已有交易！不過呢行已無乜肉食，租金、技術支援、軟件提升樣樣都係錢，所以接盤的人不多。長遠看，C組經紀行漸趨萎縮，執笠的消息仍會不絕於耳！

致富多自置舖慳一截

周：致富證券副總經理周韻姿（Maggie）

高妹： Maggie，你哋好有先見之明，一早買定唔少舖位，廿間分行有十三間係自置物業，可慳番唔少租金使費！

　周： 記得沙士過後，好多物業舖位都好平，湊巧我哋要擴充業務，就決定直接買舖，仲可為資本增值。當時一個美孚舖位（約900呎）只值四、五百萬，依家起碼升咗五倍！而十三間自置舖位中，現市值最高的應是灣仔分行（約2,000呎），約值6,800萬。不過，唔計自置物業，其他舖位一樣要捱貴租，如荃灣分行的月租要十萬，所以我哋早兩年喺附近買咗個舖位，諗住等租約完咗之後搬過去，唔經唔覺舖位價值已由二千多萬升至六千萬！

高妹： 嘩，咁會否繼續買舖？其實將舖位放租，咪仲賺得多！

　周：唔會喇！政府曾兩度出招，大大增加物業買賣成本，加上依家啲舖炒得太貴，唔抵買！講開又講，出租物業的利潤愈見吸引，但我哋做證券生意嘅，總要有舖位畀街坊駐場，加上自己舖又可做埋宣傳，除非真係可以天價放租，否則唔會考慮住！

高妹： 致富有成廿間分行，邊間最好賺？仲會再開分行嗎？

　周： 旺角、荃灣、九龍城三間分行都幾旺場，但有好多人都未必到分行落盤，打個電話或上網都做到買賣，所以冇話邊間最好賺，只可答你平均都唔錯。然而，今年冇打算再開分行喇，現時分行數目已足夠應付，加上開舖成本愈來愈貴，計埋裝修費、報價系統、人工及燈油火蠟，閒閒哋要二百萬本金！

凱基新界插旗量取勝

鄺：凱基證券亞洲營運總裁鄺民彬

高妹： 租金升唔停，證券行老闆要扭盡六壬去慳皮！

　鄺： 這是大勢所趨，就好似我哋總行喺○九年已由中環甲廈搬至灣仔甲廈，足足可慳回50%租金。事實上，地舖有較大宣傳效果，但舖租實在太貴，咁搞法好難賺錢，所以我哋六間分行都係樓上舖，主要靠股票經紀去發掘客源，當中以金鐘及上環分行的租金較高，但其生意額不錯，可抵銷租金壓力。

高妹： 依家搞一間證券行，少啲資金都唔得！

　鄺： 冇錯，依家的佣金太低，證券行僅能以「量」取勝，當中需要資金去擴充業務，所以我們尤其着重分行的部署，大多圍繞商業區，並會在擁有很多潛在客戶的社區如荃灣及元朗插旗，雖然舖租增加了經營成本，但分行係與客戶溝通及保持關係的重要基地，所以計劃今年會開多一間，依家仲研究緊詳情！

海通主打樓上夠節約

潘：海通國際（00665）執行董事兼營運總監潘慕堯

彩兒： 海通係中資行，照計水源充足，應可抵抗「乸脷」租金！

　潘： 哈，你可以咁講嘅！不過，我哋全部分行都係樓上舖，租金加幅相對冇咁犀利，加上旗下十一間分行（不包括澳門分行）的租期不一，續租壓力不會一下子浮現。平均計，去年舖租貴咗三成，仍在可控制範圍內，否則我哋惟有另覓地方，如上月銅鑼灣分行便遷移至同區較細舖位，以抵銷租金加幅！

彩兒： 證券業生意愈來愈難撈！

　潘： 除面對租金上升，還要承受交易佣金下調壓力！這已不是新鮮事！證券業的發展須不斷轉型，遷舖之外，也要諗多啲開源節流的辦法，如公司會擴大貸款等中介業務，亦會積極增加機構銷售。此外，儘管市場鬥平佣，但我哋無意打價格戰，而是側重經紀服務，吸納有潛力的投資者。正因如此，我們每間舖都有錢賺，不僅銅鑼灣、旺角等人口密集地區的業績理想，北角及元朗分行也有不少捧場客，尤以元朗區的生意最好！

高妹、彩兒

若有料報畀高妹同彩兒或有嘢問，可電郵money.biz@opg.com.hk