郭台銘上個禮拜心情靚靚，皆因約好咗聲寶高層奧田隆司、片山幹雄喺日本傾收購一事，但聲寶卻臨時通知郭台銘，話已經戀上三星。郭台銘好後期至收到消息，知道聲寶要移情別戀，結果兩家人會談無疾而終。
入股聲寶 三星截胡
「鴻寶戀」喺舊年三月開始，之後聲寶股價暴跌，鴻海舊年八月就話要「停一停、諗一諗」，雙方就係咁拖拖拉拉。
郭台銘呢排之所以肯同聲寶重修舊好，重新傾收購嘅事，都係因為鴻海受日本銀團支持，而日本銀團就希望郭台銘入股聲寶，解決聲寶嘅財政困難，促成「鴻寶戀」。
不過突然殺出一個「程咬金」，令到鴻海鬼死咁傷心。如果今個月廿六日投資限期前，大家都達成唔到任何協議，睇怕「鴻寶戀」都幾難開花結果！