金融徐筆:光大國際前景亮麗

近年光大國際(00257)已躍升為綠色工業龍頭大哥大,集團有規模、有技術、有彈藥,喺爭取項目上擁有極大優勢。加上垃圾焚燒產業得到國策嘅大力支持,光大國際嘅風頭可謂一時無兩。

集團去年純利11.23億元,增長40%,如撇除已售福州青洲大橋嘅收益,核心經營盈利為8.81億元,增長19.5%,仍屬高增長。主要盈利來自營運收益,但政府補貼同退稅等收入都係主要來源之一。集團積極申報國家環保津貼同稅務優惠,已獲政府補貼3,977萬元人民幣、增值稅退稅4,609萬元人民幣同所得稅退稅1,757萬元人民幣,相當於核心盈利嘅14%,咪話唔犀利。

雖然Prof. J成日都溫馨提示要留意補貼嘅持續性,不過暫時睇,呢輪國策都仲未有退嘅迹象,而且光國亦都一步一腳印咁發展業務,風險相對就輕咗。

預留充裕發展資金

經過去年配售集資同出售青洲大橋後,光國總負債對總資產比率由52%降至48%,再加上同亞洲開發銀行簽訂3億美元嘅長期貸款協議,為集團裝滿彈藥。

現價5.5元,市盈率約19倍,雖然息率得1厘,但股價回報較有潛力。如能維持高增長,有高PE也不足為奇。光國準備迎接第三個五年,未來所得嘅新項目亦將有助於股價,Prof. J仍睇好中長線。繼續追蹤,出發!

香港大學電子金融服務榮譽助理教授 徐燦傑