巴菲特外號「股神」，投資功力深厚就唔使講喇，不過藝高人真係膽大，因為佢竟然請上周揚言唱淡巴郡嘅對沖基金經理卡斯（Doug Kass），去佢個股東會，作為可以向巴菲特提問嘅人選之一！
其實巴菲特喺上周五發出嘅年度公開信都透露過，佢今年想請位巴郡淡友上嚟股東會，當係搞搞新意思，點知佢前日接受訪問嗰時就話，嗰位淡友就係Seabreeze Partners管理基金經理卡斯。卡斯話佢都係到巴菲特受訪嗰時先知呢個消息，對於被選中覺得受寵若驚同埋榮幸喎。
巴郡股東會一向都係金融界矚目盛事，去年就首次邀請三位金融分析員向巴菲特同埋巴郡副主席芒格提問，今年除咗卡斯之外，就請咗一位專注於保險嘅分析員，同埋一位專注於其他業務嘅分析員。
喺華爾街打滾多年嘅卡斯唔肯講點解佢最近睇淡巴郡，亦唔肯透露旗下基金資料，對於喺巴郡股東會中可能要面對萬千「股神」粉絲嘅群眾壓力，卡斯話佢驚都未驚過，真係搞到絲絲好想睇吓到時係巴菲特定係卡斯先稱得上係「真金不怕洪爐火」呀！