絲絲講場:長揸恒生40年回報千二倍

恒生銀行(00011)八十歲大壽,加上去年業績好過預期,仲係李慧敏(Rose)上任該行副董事長兼行政總裁後第一份全年業績,聽講恒生將會按表現分發花紅,就算花紅唔夠多,都收到八達通作為紀念,公司上下不知幾歡欣!

絲絲嘅老友好細心計咗條數,發現七二年恒生上市當年錄得純利4,620萬元,而一二年純利就錄得194.26億元,足足上升咗419倍!以股價計,恒生嘅股價較上市嗰陣(計埋期間派發紅股及股份拆細),升咗138倍。

喺七二年以每股100元認購100股恒生股份,揸到去年年底,收嘅股息竟然有190萬咁多。又假設將每股收取嘅股息,再投資購買恒生,以最初一萬元投資計,依家股東總回報達到1,252倍。

李慧敏董事酬金1138萬

如果絲絲早十幾年出世,又咁啱買咗恒生嘅股票,就發達喇!

既然公司賺到錢,員工嘅功勞一定係最大嘅,尤其係擔大旗、lead住員工一齊向前衝嘅管理層!Rose由去年五月起上任,表現夠晒平穩,作為董事嘅Rose就袋咗1,138.7萬元酬金,而去年五月離任嘅梁高美懿(梁太)就獲得1,039.2萬元酬金。

余詩韻