絲絲講場：鄭志明飛去東瀛練日文
日本真係唔少港人嘅第二個鄉下，新創建（00659）執行董事鄭志明（Brian）一年都去幾次喎！Brian話，喺美國留學嗰時，日文係佢選修嘅外語，貪日文比較易學同埋用到，雖然畢咗業咁多年，依家Brian嘅日文仍然「嘞嘞聲」。
Brian就話學語言嘅嘢冇秘訣，唯一就係要經常講同睇，所以佢每年都會飛幾轉日本去練習，順便可以探吓朋友！
今年先三十歲嘅Brian已經係多間上市公司嘅董事，喺新創建就負責監督基建業務、併購等等，所以近年都經常要中港兩邊走去傾生意。
避開劈酒少上華北
講到呢度，Brian都忍唔住都要呻吓，開頭最唔習慣嘅係內地飲酒文化，佢都用咗一段時間去適應，當中又以北方較南方飲得勁啲，所以佢話自己就少啲去北方！
不過「避得一時，避唔過一世」，睇嚟Brian要認真考慮吓請番個「酒鬼」助理嚟擋酒好似會實際啲。
余詩韻