筆迹學家根據一眾美國當紅科網CEO嘅簽名分析佢哋嘅性格，而其中Twitter創辦人杜斯（Jack Dorsey）同蘋果行政總裁庫克（Tim Cook）都有兩個簽名，代表唔同身份。
Twitter創辦人杜斯其中一個簽名「有名無姓」，仲加咗個「@」喺前面，筆迹分析師話佢係一個好率直嘅人。而且「k」嘅尾巴向下傾，好可能佢係一個成日會從歷史中學習嘅人。而第二個簽名雖然寫晒全名，但就只係簽咗第一個同最後一個英文字，即係「Jk Dy」，反映佢個人收收埋埋。不過咁樣簽名嘅唔止佢一個，個名水蛇春咁長嘅Facebook創辦人朱克伯格（Mark Zuckerberg）都係咁，只係簽咗「Mk Zg」，表示佢係一個鍾意暱喺幕後做嘢、控制大局嘅人。之不過，絲絲就覺得朱仔嗰簽名好似漢字嘅「孖」字嘞！
至於蘋果公司行政總裁庫克簽名中有一個好大嘅「C」，反映佢以自己嘅姓為傲，尊重家庭。私底下佢仲有一個火星文簽名，筆迹十足BB學寫字咁，難以想像出自庫克嘅手筆，但筆迹家就話睇得出佢個腦諗嘢，仲快過佢隻手寫咁話。
至於蘋果公司已故教主喬布斯（Steve Jobs），就鍾意用粗marker簽名，就好似佢嘅招牌黑領咁特別。佢嘅簽名特色係無大細階之分，呢一點可以解釋佢為人謙卑。另外，佢嘅簽名幾乎無斷開過，可見佢係一個一開摩打做嘢就唔會停嘅人。
微軟創辦人蓋茨（Bill Gates）嘅簽名可以話係最清晰易讀，分析師都話佢係一個表裏如一嘅人，就連「i」上面個一點都無漏，反映佢思考快捷但同時亦願意坐低聽取意見。
余詩韻