Market Insight：百貨股寒冬未過

個市確實有少許迷你股災味道，數字唔識講大話，昨日大市升跌股份比例去到15對85，是踏入一三年以來最一面倒，沽空佔大市的成交比例，由9.74%升至12.04%，是去年八月三十一日以來最高，可見大孖沙清倉不特止，仲要沽凸賭跌。

主觀因素，近期歐元、英鎊及日圓大弱勢，美元卻轉強，市場解釋乜叫做百害取其輕。歷史上，美元強向來都對港股不太有利。

放大圖片

放大圖片

即將踏入三月企業業績高峰期，唔少公司已經black out，可見短期內無新炒作消息曝光，去年第三、四季港股升幅唔細，將業績復甦透支得七七八八，第四季業績唔掂的，芬佬早在過去兩個月派得就派，避免揸住等成績表衝擊股價。

今年入市股民被綁

另外，人行春節假期歸來未停過正回購，抽走市場游資，收水行動已是路人皆見，配合日前溫總公布新國五條，即使內容大致新瓶舊酒，但市場揣測，三月份兩會前會有更多細節公布，新一輪壓抑樓市措施，包括擴大房產稅試點範圍將不日上映。睇落成個市好消息一單都無，唔明朗陰霾掃埋一籮籮，港股又企在23,000至24,000點高位蟹貨區一段時間，遲遲未能突破！

技術上，今年一月二日大市勁升655點，當日恒指最低位22,860點，比昨日收市價22,519點高，意味今年入市，大部分已經被綁在高位，未來大市如果再跌，可能成為每次反彈的新阻力，二月底至三月市況會係點？

昨日飯局，古勝同幾個賓架傾開，非正式統計，認為今浪要從高位回吐一成，先會再有買貨意欲，以23,944點，跌一成要見21,549點，仲有成千點距離。

業績表現有驚無喜

之前建議，由三四五線股轉番去揸防守力及流通量較高股份，假如已經轉好貨，應該唔怕尚餘的一千幾百點跌幅，如果叻到全身而退揸住「茄薯」，倒不如疊埋心水等扑傻瓜。

近期打頭陣出業績的內地百貨零售股，暫時仲係有驚無喜，百盛集團（03368）業績跌24%至8.51億元人民幣，差過大行預期，昨日連5元都守唔住。上市七年，得番當年上市價一半！

茂業國際（00848）去年少賺25%至8億元人民幣，百麗國際（01880）預告業績只及市場預期中下限，昨日留意到唯一逆市奇葩高鑫（06808），都算係百貨股中最強勢一員，昨日有近0.4%升幅收報10.92元，往績市盈率44倍，即使去年業績有四至五成增長，依然是貴絕同業，揀唔落手。

昨日提過的安踏體育（02020），去年業績跌21.5%至13.59億元人民幣，以慷慨派高息頂住股價，由昨日要再跌6.6%報7.06元，可見市場暫時唔多「受」。

至於一早預告去年盈轉虧的國美電器（00493），上周表示內地樓市交投轉旺，年初家電銷情遠超預期，之後死貓彈見過0.96元，遇着連日跌市，被沽家秒殺，昨最低落到0.81元，與一月初高位1.18元比較，累積跌三成一，返回去十二月初起步位，走勢之弱令人惋惜。

正好反映復甦故事，已經唔足以討好只爭朝夕的基金經理，惟有等埋三月底，好好醜醜業績出埋至算。

魚缸新丁令人失望

大市持續走低，細價股炒作氣氛不再，就連半新股亦都走晒大樣，好似一月三十一日才掛牌的中鋁礦業（03668），昨日股價創上市以來新低1.25元，較招股價1.75元低28%；而二月五日掛牌的榮陽實業（02078），股價同創上市以來新低2.44元，較招股價4.13元跌四成有多。半新股表現如此差劣，足以令投資者對認購新股卻步！

古勝