絲絲講場：恒生李慧敏團拜大紅人
恒生銀行（00011）一姐李慧敏（Rose），衣着唔係黑就係白，間唔中加灰色，早幾日令絲絲眼前一亮，「紅鐺鐺」成個利是封咁，原來係應節，一連兩日，喺中環總行舉行新春團拜酒會，同超過2,000名商業及企業客戶拜年。
二千客戶新春歡聚
Rose舊年五月接替梁高美懿做恒生嘅副董事長兼行政總裁，上任初期，市場對呢兩位一姐冇乜可以比較，惟有比較吓衣着，又發現真係好大分別。梁高嘅衣着色彩豐富，Rose衣着似足熊貓，黑白當道。話晒係第一次做主持恒生嘅新春團拜，Rose今次着紅色襯衣，配合番自己個名，又應節，好多人都讚眼前一亮。
除咗同2,000個客戶團拜之外，佢哋仲安排咗財神大派利是，祝願各人吉星高照。
接金財神全年好運
現場仲有「估重量」遊戲玩添，玩家要用器皿盛載金元寶，最近800克嘅就算贏，Rose更加親自落場玩埋一份，唔好睇佢平時嚴肅嘅模樣，參與遊戲時都好投入o架！
席間有抽獎活動，預備咗50個金財神送畀客人，有上年抽中獎嘅客人話，金財神令佢全年都咁好運！酒會亦設有富中國特色嘅剪紙同糖畫手工藝攤位。剪紙師傅用靈巧嘅雙手，剪出活靈活現嘅十二生肖動物；而糖畫師傅就用麻糖喺平面上作畫，睇到一眾貴賓入晒神。今年節目咁精彩，唔知下年又有咩驚喜？