好快又踏入業績期，市場喺二月理應不會有太大波動，普遍分析員都認為大市會以補裂口為主，直到三月開始派過去一年嘅成績表。有幾個大嘅行業總會較受人注目，猶記得內銀一直受資本充足比率困擾，幾間內銀先後推出大型供股計劃，而且仲有貸款壞帳隱憂，所以過往一年股價表現麻麻。
農業銀行（01288）係最後一隻上市嘅國有銀行，唯一未進行供股計劃，所以成日被人傳佢要配股。但Prof. J認為內地經濟有望復甦，農行應該會受惠。再加上經濟好咗，壞帳撥備亦有機會減少。繼而融資壓力亦有所紓緩，無咁大壓力，股價可望追落後。
喺一一年底時，農行嘅一級資本充足比率只得9.5%，係咁多間大型國有銀行中最低，所以唔可以怪市場一直憂慮佢有集資需求。但去年第三季公布嘅一級資本比率已經稍有改善至9.76%。再加上內地今年實施嘅新資本要求，亦獲中銀監提供過渡期，系統性重要金融機構嘅一級資本比率，今年目標只係7.5%，兩個巴仙嘅資金可以為農行創造好多價值。
隨着內地經濟慢慢好轉，如果農行嘅撥備有下降空間，就可以支持到今年盈利增長。同時亦可望受惠城鎮化概念，始終農行喺農村嘅網絡不容忽視。
Prof. J相信，農行嘅集資壓力已經減輕，不過亦都唔可以排除基於市況持續改善，農行會吼準時機進行融資，以補充資本。繼續追蹤，出發！
香港大學電子金融服務榮譽助理教授 徐燦傑