絲絲講場:萬順昌CEO酒量掛鈎銷量

正所謂入鄉隨俗,所以唔少外國人嚟到內地做生意第一件事就係學識「以酒會友」!身為鋼材經銷商萬順昌(01001)嘅CEO莫非凡(Frank Munoz),話自己嚟咗中國七年,好快就明白到呢個內地文化,尤其係佢哋嘅行業,佢仲話傾生意時,飲白酒量同生意量嘅比例係一比一,即係話要飲一噸白酒先傾成一噸鋼材生意喎!

絲絲都知Frank係講笑,但呢個比喻都好貼切。不過真係有好多內地人白酒當水飲咁,但Frank話近呢兩年,內地人都改變得重視健康多咗,飲酒冇以前咁兇猛,所以傾生意都輕鬆啲咁話。

廢料回收瞄準換車

其實Frank從事鋼材行業已經廿幾年,佢坐正萬順昌CEO幾個月已經滿腹大計,包括新增金屬廢料回收嘅業務,睇準內地未來幾年汽車同重型機械需要換代嘅商機,而且仲將美國成功經驗帶嚟公司。另外佢又將公司由經銷商轉型至服務商,咁樣毛利率都會提升唔少添,加上未來幾年,本港有唔少基建項目開動,怪不得管理層對前景充滿信心喇。