絲絲講場：恒生過百義工迎春送暖
農曆新年又到，除咗傳統上嘅派利是同送禮物之外，恒生（00011）一班高層日前就好有心思咁，帶領恒生義工織溫暖牌送畀幾百位老友記，一齊過一個暖笠笠嘅春節。
為老友記織「溫暖牌」
恒生零售銀行及財富管理業務主管陳力生，早前聯同三位女高層，加埋過百個恒生義工，用咗超過三千粒鐘，織咗500條冷頸巾同200頂冷帽，到社區服務中心親手送畀700位老友記。
除咗有愛心溫暖牌收，幾位高層同一班義工仲同老友記打成一片，大玩遊戲，搞到絲絲都想加入埋一份！
其實恒生一直都愛心爆棚o架，佢哋嘅義工隊周不時都搞吓活動，好似成立咗支愛心剪髮隊幫老友記剪頭髮、又為老友記準備一餐特別嘅中秋午膳咁，而且仲安排一啲基層嘅小朋友到唔同景點參觀、同搞吓「惜樹教育大使」計劃宣傳樹木保育呀咁。
余詩韻