恒地主席李兆基（四叔）與新地（00016）郭氏家族分屬世交，所以每逢農曆新年，郭老太郭鄺肖卿都會帶埋郭氏家族成員，齊齊到四叔處拜個早年，而四叔則喺初七後回訪郭家。不過，今年蛇年，四叔一反以往十多年嘅慣例，叫郭老太唔好走嚟走去啦，據知佢老人家喺初五前已經向郭老太拜個早年。
唔使絲絲講，大家都知四叔梗係體諒郭老太身體，唔想老太舟車勞頓。至於四叔派利是，絲絲聽聞好多新地管理層都收過，往常新地高層喺初七後同郭老太拜年，碰啱四叔亦到，只要有人喺四叔身邊閃過，四叔都會派兩封大利是，每封2,000大元。今年四叔雖然提早同老太拜年，但亦好識做，話晒四叔都係新地副主席，所以佢亦預咗一疊利是畀新地高層。
余詩韻