絲絲講場:港交所豪派 出市員醒晒

蛇年紅盤高開高收,股民肯定飲得杯落。港交所(00388)尋日亦趁住蛇年開市大好日子,喺交易大堂向出市員大派利是,估計短短十幾分鐘就豪派3萬大元!不過,相對港股一日成交有成幾百億元計,真係濕濕碎到冇得比!

十幾分鐘派3萬蚊

早前絲絲已經講過話港交所今年畀出市員抽嘅「特別版」利是,除咗「金牛」外,仲加埋「大牛」,等出市員發番個新年財,一年行好運。港交所尋日果然不負眾望,主席周松崗同行政總裁李小加化身「財神」,向出市員派咗10封1,000蚊、20封500蚊、同超過200封50蚊利是。數數手指,即係短短十零分鐘內,就派咗最少3萬大元利是,真係好豪呀!

雖然今年冇出市員好似上年咁好彩,一個人連抽到兩封「金牛」,但見個個出市員打開利是個樣,開心到好似執金咁見牙唔見眼,都知佢哋好滿意喇!

話時話,平時交易大堂只係得番七、八十名出市員,尋日開市出市員就有成百人,佢哋無非都係想碰吓運氣,等今年股運亨通。唔講唔知,原來港交所員工開工利是都係100蚊,所以出市員應該非常滿意。

出名笑容燦爛嘅周松崗喺開市儀式後就話,今年見到歐美、中國同亞洲等經濟開始有復甦迹象,希望蛇年市況比龍年好。

余詩韻