周松崗除咗做港交所（00388）主席之外，仲有一大堆公職，原來佢讀書時代同好多學生一樣，都要搵兼職賺外快，搵唔到錢分分鐘要返歸。依家回想起嚟，佢係笑住講，但當中有唔少辛酸。其中一份工，係上門推銷字典，據美國一個統計，唔少大企業嘅CEO，都做過同一份兼職。
時間要推前返去六十年代，留學美國嘅周松崗有一年嘅暑假搵到一份上門推銷字典嘅工作，每本售價10美元，每賣出一本推銷員可賺5美元佣金，睇佣金好似好和味，但真係唔係咁易賺，好多人缺少技巧同耐性，做唔夠兩日，已經唔撈。
難得嘅係呢份工都有職前訓練，教授銷售技巧：例如教你拍門唔好拍正門，要拍後門，因為辦公時間美國嘅家庭主婦通常都會喺廚房工作；甚至有人應門同埋應咗門後，推銷員企嘅位置都好有技巧，既要畀主人家睇到你，又要令佢唔覺得你好冒犯，令佢又好難「嘭」埋道門。
遇着孤獨老人，就要小心，獨居人士難得有人同佢傾偈，會捉住你唔放，與其浪費口水，不如盡快「搵過另一戶好人家」好過；仲要識啲心理學，知道邊啲家庭最肯使些少錢買本字典，幫仔女增值。
份工做咗三個月，周松崗記得自己賣咗400本字典，賺咗幾千美元，夠生活費有餘，係好好嘅成績。咁多CEO都做過上門推銷，可能就係要有鍥而不捨、堅持要賣出產品嘅精神，先可以做到高層。