中銀香港（02388）尋日喺銅鑼灣開分行，一於大鑼大鼓兼舞龍舞獅，中銀香港副總裁楊志威（Jason）介紹間分行時講到鬼咁自豪，佢話銅鑼灣分行嘅設計理念融合咗中銀大廈同竹樹嘅特色，取個節節上升嘅好意頭咁話喎，仲讚個新設計「簡約而不簡單」。
新分行佔地3層，有成1萬呎咁大，設計仲加入咗唔少環保元素，例如用電子簽名板代替用紙同筆簽名，櫃台交易更加趨向無紙化。
雖然好多銀行嘅日常運作都以電腦取替人手，但Jason向員工大派定心丸，表明電腦化下唔會裁減人手，今年內更加會增聘超過1,000人。依家中銀香港有超過200個網點，其中40間大分行會喺五月前完成優化！