近排港股強勢，窩輪日均成交又經常重上百億元大關，但就唔代表間間輪商都咁好景。好似去年已盛傳將逐步淡出本港輪場嘅德意志銀行，連依家市場上僅餘一隻窩輪：滙控購證29135，都已經喺前日（周三）起停止買賣。
絲絲仲得知，德銀嘅副總裁王子健（Charles）拍低咗當日呢隻輪嘅最後一刻，貼喺社交網站facebook上面，搞到朋友們都唔知應唔應該畀個like佢。尋日絲絲嘗試搵Charles傾幾句，點知打極電話都搵佢唔到。絲絲覺得Charles咁做，反映佢都係一個比較感性嘅人。
事實上，由於德銀已有一段日子冇再出窩輪，所以絲絲早幾日都問過德銀嘅發言人，問吓佢哋當最後一隻窩輪到期後，係唔係代表德銀會全面退出在港嘅窩輪業務？同埋窩輪銷售部嘅員工將何去何從？但發言人都只回覆一句：公司拒絕回應。
但聽小道消息講，該行部分員工會由窩輪銷售轉去幫手做交易所買賣基金（ETF）業務，都未至於要喺農曆新年前食無情雞。
余詩韻