每隔一排都有啲得意或者好意頭嘅網址畀人註冊咗，不過絲絲都係第一次聽見有人用呢個手段去向死對頭報復！
話說美國著名對沖基金經理阿克曼（Bill Ackman）一向敢言，曾經喺一一年揚言港元會脫鈎兼升值，仲話有落注添。早前阿克曼就出口術攻擊美國保健產品直銷商康寶萊（Herbalife），發表三百幾頁報告指控佢哋嘅推銷手法。
阿克曼嘅評論一出，即時令到康賽萊股價大插超過三分一，搞到公司高層要急急腳召開股東大會，同各位投資者解畫。
日前美國嘅監管機構啱啱公開話會打擊非法傳銷活動，雖然無話關康寶萊事，但康寶萊嘅股價就即時跌咗11%，真係無妄之災。
先前康寶萊除咗獲得股東之一嘅美國富商艾肯公開力撐外，一直都無乜大動作反擊，但原來係秘密咁做緊嘢。最近有傳媒發現，康寶萊喺今年一月註冊咗幾個域名，全部都包含阿克曼個名，好似billackman.net、therealbillackman.com等等，而且呢啲網頁全部都係空白一片。據聞阿克曼本人好嬲，佢喺一個電話訪問表示，一間正正經經嘅公司根本唔會做呢啲嘢，康寶萊搞小動作只係想轉移大眾嘅視線。