金融徐筆：珠海控股重新出發
九洲發展（00908）係唯一喺香港上市嘅珠海公司，日前終於拍板公布易名為「珠海控股投資集團」，仲同珠海大橫琴投資有限公司簽訂項目合作協議。主要內容係於中國橫琴合作投資建設、營運集碼頭客運及候船大廳、購物中心、酒店及寫字樓嘅航運中心綜合體。
其實集團易名並唔係新鮮事，原本早喺一九九八年五月上市時，係叫「珠光發展」，其後更名為九洲發展，今次再進一步更名為珠海控股。Prof. J幾欣賞集團嘅靈活多變，因為每次更名都係為咗更適應佢嘅戰略規劃同經營發展需要。
夥拍國企發展橫琴
珠海控股本身擁有高速客輪公司、九洲港客運站、珠海度假村、圓明新園等股權投資企業，而今次同集團簽訂合作嘅夥伴大有來頭。珠海大橫琴投資有限公司喺橫琴區屬國有獨資企業，為橫琴新區基礎設施建設投融資和資本運營平台。
根據合作框架協議，雙方擬成立一間項目公司，並且會由兩者共同擁有。有資料顯示，根據橫琴當地規劃，當地擬投資逾15億元人民幣發展洲際航運中心，內裏亦包括酒店、航運及商業元素。珠海控股將對項目進行盡職審查，不過若未能夠取得所需政府部門批次，或簽訂合作框架協議後5年屆滿時，有關協議就會取消。
Prof. J覺得改名之後，集團喺市場上有更清晰定位，亦明確反映同珠海市嘅獨特關係、體現該公司之業務性質以及未來在珠海的發展潛力。繼續追蹤，出發！
香港大學電子金融服務榮譽助理教授 徐燦傑