近年租金「癲」升！好多老店因為頂唔住業主加租，一家又一家輪住執笠，搞到絲絲冇晒啲童年回憶。其實租金「癲」升已燒埋所有不同嘅物業，寫字樓不能幸免，就連經濟學家關焯照都話租金咁升法，搞到自己做生意租寫字樓都難上加難。
早年喺中文大學教經濟學嘅關焯照，離開校園之後，就轉以獨立經濟學家身份繼續研究經濟，近來更打算自立門戶，開投資顧問公司。不過，搵office就成為佢嘅頭號難題，目前只能借用朋友公司喺金鐘嘅地址。
開投資公司，總會聯想到金鐘、中環一帶，不過佢同絲絲講，喺金鐘寫字樓嘅租金已經貴到「冇可能租」！退而求其次，打算過海去佐敦，搵吓啲乙、丙級寫字樓，但五百幾呎嘅單位，月租仍要兩萬幾蚊，雖然有晒客戶網絡，但萬事俱備，只欠東風，佢覺得今年租金仍然難跌，公司幾時開得成都未知。
佢仲有啲不滿話，「喺香港，小本經營根本好難做，地道小店一係交唔到租要結業，自置物業嘅老闆見舖頭升值幾百倍，不如賣舖好過，可見香港經商環境愈來愈差，租金絕對係罪魁禍首！中小企做埋做埋只係用來交租，仲可能要受夥計氣，仲邊有人肯做生意？」
余絲韻