期指觀瀾：結算前觀望為上
昨日A股勁升2.4%，對上星期跌多升少的港股，起到一定支持作用，可惜近期港股動力減弱，缺乏新消息刺激，是路人皆見，尋日恒指早市升見23,736點，創今浪新高位後，好友再攻的興趣唔大，上升動力不足下，港股橫行悶局捱到收市，升91點報23,671點，主板成交674億元是踏入一月以來，第二低紀錄，港股高位升唔上，跌唔落的局面，恐怕要等周三結算後，方有分解。
炒股唔炒市，確實不是港股專利，美國恐慌指數（VIX）近期拾級向下，去到五年低位，主攻細價股的羅素2000指數，創下歷史新高，香港簡直倒模一樣。君可見，恒指波幅指數上星期創下12.18的有紀錄以來新低。俗語有話「眾地莫企」，市場幾乎一面倒看好之際，本應嘗試以逆向思維去試沽，奈何筆者也想不到，資金充裕，中國經濟復甦，歐美股市強勢畢呈，可以有甚麼支持做淡的理據。
一月份，撇除首日過600點的抽升，基本上恒指波幅是罕見地狹窄，在23,088至昨日高位23,736點之間的648點運行，今個月與其搵唔到錢，不如等結算後再算，昨日睇見就算一月23,600或23,800點，無論Call或Put，得番唔夠50點水位，為粒糖輸間廠就無謂。
John Mullen