Market Insight：安踏體育收集之選

事實上，今個星期外圍有唔少事情值得留意，但大抵是好嘢港股未必跟，萬一有乜冬瓜豆腐，臨過年先輸番鋪勁，咁就真係無謂。看官有必要留意本周美國聯儲局議息會議，講真，幾可肯定息口唔會有變化，但去年擴大量寬規模到每月850億美元後，伯南克開始轉口風，把量寬時間表同失業率及通脹表現掛鈎，假如言論再有任何明示或暗示退市，對處於高位的華爾街三大指數，大插未必，小跌難免。當然，周五的就業數據假如出奇咁強勁，都會令市場把「退市」二字作無限聯想。

古勝仲留意到亞洲貨幣昨日明顯異動，韓圜單日貶值1.7%，跌番去十一月初水平，新加坡紙跌到去年九月的1.24邊，有迹象資金開始流出亞洲新興市場，純粹係季節性波動抑或大孖沙們鳴金收兵，未來幾日真係要睇到實。

中金再生未宜沾手

美國沽空研究機構Glaucus，出報告狙擊啱啱周末宣布高價易手的中金再生（00773），話公司自稱內地最大廢金屬回收商，純屬子虛烏有，建議強烈沽售，目標價仲絕到畀佢「零雞旦」，不過公司回應話Glaucus的指控完全失實。舊年八月，Glaucus狙擊西部水泥（02233），後者停牌出晒澄清都要被隊，假如上星期買落，準備趁央企中國節能環保入股消息食胡的，今次真係多得Glaucus唔少。留意到，近日中金再生沽空確實有異動，過去六個交易日，五日沽空佔成交比例四成以上，淡友看來是做好部署，古勝都係買定花生等睇戲。

放大圖片

放大圖片

朋友問起李寧（02331）單蠱惑供股，係咪真係有基金受章程限制，無得低價加注。古勝意思並唔係有基金笨到唔供損害投資者，而係，部分基金章程列明不可投資或持有非交易證券，呢類基金好有可能，選擇在呢隻唔掛牌，無息兼無到期日的零息債券除淨前沽出李寧。

今次體操王子財技令人眼界大開，有云一次不忠、百次不用，今次大股東聯袂私募基金搞咁大龍鳳，講到尾係要玩小控大，低價增持，有貨股民當然唔好放棄，二仔底死跟到尾，無貨的真係睇見怕怕，要揀純種國產體育品牌，安踏體育（02020）變成不二之選。

維持慷慨派息政策

安踏月中見過8.72元，連日調整，未知係咪換貨影響，昨日開6.89元後，由頭升到尾收報7.4元，升0.51元。

從安踏公布數字，今年第二季訂單情況仲未見止跌迹象，較一年前跌15至25%，大致與內地運動行業整體跌幅20%相若。不過，去年市場共識，體育行業一三年上半年業績見底的預期，看來機會唔大，猶幸是庫存高峰期，較有可能在去年第三季見了最壞的時候。

股價往往比實際營運走得前，去年七月安踏股價在4元水平起步，至今升幅超過八成，考慮公司去年中期，手持淨現金逾47億元人民幣，相當於每股2.35元，即使業績復甦需時，至少慷慨的派息政策有一定保證（過去四年盈利派息比率均在六成以上），以5至6厘股息，現股價相信下調水位唔多，最啱趁弱市收集。

深國價位細夠好炒

前海概念股仲未炒完，昨日見隻中集集團（02039）升7%，收報15.84元，成交5,065萬元；而深圳國際（00152）亦由全日低位1.01元反彈上全日高位1.08元收市，升2.8%，成交4億元。由於前海發展規劃才剛剛啟動，話呢個概念冇咁快炒完亦唔出奇，而論價位，照計隻深國好炒過中集，睇吓1元邊抖氣過後，能否再上試高位1.2元。

古勝