金融徐筆:深國還有增值空間

呢期人氣最高,就梗係前海概念。早幾日一傳話深圳市政府將審批前海《土地出讓暫行辦法》,而前海跨境人民幣貸款商名單可能喺下星期一公布後,啲候選銀行佳麗即刻彈上嚟。Prof. J預期有關前海發展嘅消息會陸續有來,相關概念股會繼續跳舞。

其中市場最感興趣就係有關前海嘅土地政策,憧憬啲地主會因此水漲船高,惹嚟前海地王概念股炒作。雖然前海管理局經營發展處處長、新聞發言人王錦俠否認有「三大地主」呢回事,強調前海依家進行緊土地整備,但承認部分土地使用權確實由個別企業擁有,而當局正同佢哋協商出讓使用權。

與政府合作締雙贏

粗略估計,三地王總估值高達4,700億元人仔,而深圳國際(00152)亦都擁有前海地王部分權益。集團喺深圳前海揸住唔少土地,目前位於前海灣物流園區嘅西部物流園,土地面積就有38萬平方米,而呢部分已納入深圳前海深港現代服務業合作區嘅範圍以內。

Prof. J覺得要啲地主無條件拎番塊地出嚟就難啲,反而有機會係政府同佢哋傾合作發展,始終雙贏至係真理。作為前海三大地主之一,深圳國際依家市值唔夠200億元,但佔地估值就高逾500億元。假如順利將前海幅地皮由工業轉做商業用途,可以為深圳國際增值33.75億元。

市場大多展望深圳政府有機會為前海作出土地重估,但Prof. J溫馨提示,如果將土地全部重估,唔少內房股折讓都仲有四至五成。繼續追蹤,出發!

香港大學電子金融服務榮譽助理教授 徐燦傑