絲絲講場：盧韋柏重遊港大主持開學
花旗集團同港大合作嘅「Citibank University Banking Course」已經嚟到第九個年頭，作為港大校友嘅花旗集團香港暨澳門區行長兼行政總裁盧韋柏（Weber），尋日亦都有嚟主持開幕禮。
Weber以前喺港大社會科學院主修經濟，隔咗咁多年，佢嗰科依家已經搖身一變，喺經濟及工商管理學院旗下，學生仲有成2,800人呢！
花旗唔爭前海頭啖湯
花旗舊年嘅業務亦好威水，佢話舊年頭十一個月，香港嘅貸款業務有雙位數增幅，跑贏行業嘅平均數，今年增長將放緩至高單位數。對於集團喺前海嘅發展，佢話其實唔一定要飲頭啖湯嘅，事關暫時仲未有客喺嗰度有投資，而將來嘅部署，仲要同內地嘅分部研究。
其實啱啱升職嘅Weber近排都幾忙，好似下個月頭就要飛去美國公幹，趁就嚟農曆新年，絲絲就喺度同佢拜個早年，祝佢新年快樂、身體健康喇！