絲絲講場：周大福基哥全力氹員工 「三陪」唔易做

周大福董事總經理黃紹基（基哥）講，為咗同員工建立良好關係，佢依家做埋「三陪」——陪員工傾偈、食飯同唱歌！

陪同事食飯傾偈

員工向來都係一間公司嘅重要資產，尤其係服務業就更甚，依家內地打工仔咁易「劈炮」。基哥指，公司同自己都分別有開網上平台畀同事交流意見，亦有同事直接「上書」向佢吐苦水添！

強調「開心工作」嘅基哥話，有好多時自己都會親自開解員工，因此少不免就要陪吓食飯，甚至會去唱歌。以前因為要開內地分店，所以成日同百貨公司老闆食飯，依家陪員工食飯仲多過陪呢啲老闆喎！

內地聯歡鬥歌喉

仲有，周大福每年都會搞一次大型員工周年大會，由於內地員工遍布各地、多達兩萬幾人，所以公司會分地區舉辦。香港呢邊需要請嘉賓娛眾，內地就鍾意搞歌唱比賽，勝在氣氛夠晒熱鬧，而且贏咗分區冠軍就有機會參加全國總決賽，所以每年反應都好踴躍！又要顧生意額，又要顧咁多員工嘅福祉，唔怪得佢話管理層唔易做。

余詩韻