Market Insight：中銀香港 錢景光明

香港磚頭貴就係人都知，近期網上熱傳一宗消息，銅鑼灣一間雲吞麵舖，捱唔住30萬元加到60萬元的貴租，要光榮結業。諷刺是地產代理隨後爆料，新簽約租客出月租出價去到100萬元。可推斷，在個人行無限推高遊客區商舖租金下，小本經營的麵檔就算過到初一，都過唔到十五。

香港磚頭有幾咁誇張，試計一計，一個每年租金1,200萬元的舖位，假如毛租金回報率1厘，間舖值12億元，數數銅鑼灣有幾多地舖，可以想像，新年要沾點旺氣，唔使響桃花樹下打圈，到銅鑼灣走走，隨時幾個十億富豪舖同你擦身而過！

放大圖片

放大圖片

旺區舖值媲美股仔

如果以1.5厘回報計價，間經營四十多年雲吞麵老舖，點都值8億元，篤一篤機，香港上市公司市值不足8億元的竟然超過600間，係舖貴抑或股仔平？古勝唔識答，一句到尾，今時今日揸住兩間舖，真係威過做二三線股上市公司主席多多聲。

深圳萬科來港買殼後，動作多多，萬科置業海外（01036）夥拍新世界發展（00017）奪得西鐵荃灣西站住宅用地發展權，呎價仲比半年前長實（00001）同區出價高一成八，志在必得味道濃到極。當然，肯定會有人認為，對市值1,650億元人民幣，或者2,067億港元的深圳巨無霸萬科，區區60億港元總投資額中只佔兩成，只不過係袋中散紙。

不過，此次交易中，古勝睇到幾個事實，一是特區政府推出無耐的SSD 2.0及BSD辣招，漸漸被市場適應，發展商對後市睇法未有太大變化（事實上，最長三年的SSD對於投資者，樓花甚至比二手樓彈性，落成收樓後，很快便可免稅轉售）。

其次，以每年在內地賣樓金額過千億的萬科，居然肯大雞食細米，唔少人認為係為吸收成熟市場經驗，也順便拓展融資渠道降低借貸成本，加上相比香港發展商，萬科手上大把巨富客戶可以散貨，實無往而不利。

不過，在下相信當中也涉及不少政治因素，上世紀七八十年代港資把英資地產商逐漸邊緣化，今日中資南下挑機，只不過是歷史巨輪的一個循環。一月至今恒指升幅幾個巴仙，但非指數成分股，炒得誇張，唔少基金都擺出「收夠籌」姿態，入市轉趨保守，形成近日即市炒作變得困難，有故事配合都只係得一兩日貨仔。

憧憬跨境貸款業務

為免上車容易落車難，看官仲係睇番有較佳基本因素的股票為宜。近幾星期，先有QFII及RQFII額度擴大，炒過一轉後，就連前海概念都有份的中銀香港（02388），股價已輾轉由24元炒上26.75元，創52周新高。唔使多講，夠平是中銀一大優勢，一三年13倍市盈率及4.8厘息，如果跌番去25.5元，股息經已達5厘，低息期下抗跌力絕對唔使懷疑，況且本地資產質素中短期無惡化迹象，業績能見度高。

再者，身為境外人民幣結算行身份，加上短期可能開展前海跨境人民幣貸款業務的憧憬，應該係贏面大、輸面有限，即使唔升唔跌，收收息已可立不敗之地。

體育板塊無謂沾手

近期體育用品股沽盤如潮，真係被人插到開花，昨日安踏體育（02020）再跌半成，中國動向（03818）跌3%，匹克體育（01968）跌4%，李寧（02331）唔使跌，皆因拉咗閘！

由於呢批股份由上季低位反彈咗五成，超賣後嘅反彈浪已完成，聽講近期各大體育用品商都把握春節前嘅銷售旺季，割價促銷，盤數唔慌靚，所以大戶索性沽貨轉炒其他板塊，呢期咁多股仔好炒，都係暫避呢個板塊為妙。

古勝