理財創富:孖妹S檔案:年報「有款」 未必揼本

孖妹考考你:股神巴菲特同散戶嘅閱讀興趣有咩唔同?答案就係巴菲特鍾意睇上市公司年報,散戶鍾意睇八卦雜誌!老實講,一本年報閒閒哋都100頁以上,一眼掃埋去,字多圖少,真係令人眼瞓多過令人興奮。但書中自有黃金屋,只要你讀通呢本「萬字文」,或可在當中找到炒作意念。今日孖妹就幫大家培養閱讀年報嘅興趣,兼搵來行內專家解構年報嘅前世今生。

毛:TOPPAN營銷部總經理 毛紹豪

高妹: 作為一間專門做財經印刷嘅公司,其實你哋印啲咩o架?

毛: 我哋嘅客戶多數是投資銀行、上市公司及律師事務所,主要幫它們印刷不同類型嘅文件,如年報、招股說明書、財務報告等。如果客戶有需要,我哋更可提供設計、翻譯、排版、校對、印刷及物流等服務,可謂「一條龍」幫客戶解決所有問題。

彩兒: 一本年報隨時有二、三百頁,加上港股逾千隻,看來呢行都幾好賺喎?

毛: 現時本港大大小小約有十間印刷公司會專做財經印刷,如果單講印刷年報,我哋每年嘅客戶大概有300多個。不過呢行好少話會加價,若紙價上升,我哋亦只會同客戶解釋番成本上漲,所以印刷費用會因而增加。其實由○六年開始,我哋已發現年報嘅印刷數量正逐步縮減,其中原因是現時上市公司唔再需要中英文年報各一份寄給股東,他們亦會在印刷年報之前發信予股東查詢是否需要收取年報,透過統計從而決定大概印刷數量。

發行一次耗資達400萬

高妹: 咁財經印刷嘅興衰期又係幾時?

毛: 如果要講整個行業嘅印刷量、生意額都最旺嘅時期,我相信會是二○○○年初期,當年科網股未爆破,創業板股票不斷增加,而且又多大型國企來港上市,印刷行業明顯多咗生意。基本上經濟低潮階段都會係印刷行業嘅艱難時期,如○三年沙士、○八年金融海嘯爆發後期,大圍經濟環境唔好,令不少上市公司都縮減開支,就算連賺錢嘅公司亦唔敢亂用錢。

彩兒: 我就好奇一般上市公司會印多少份年報?

毛: 有些大型上市公司如港鐵(00066)、滙控(00005),其高峰期印刷量大約為40萬至50萬本年報,而我哋做過嘅大客,其年報印刷量都有30多萬本。不過,現時一間上市公司每年能夠印4萬至5萬本已經叫好多,可見過往與今天年報印刷量都有幾大上落,對我哋嚟講亦係挑戰,所以公司除提供「一條龍」印刷服務,亦着力提供高質量設計去彌補印刷量下跌嘅收入。

高妹: 其實印刷機一開就印過萬本年報,咁印刷費用要幾多錢呢?

毛: 基本上20萬至400萬元不等,費用會包括設計、排版、翻譯等服務。例如有些上市公司出得起錢,真係會叫你返內地幫其所有廠房影晒相,然後放喺年報當作部分內容,可見印刷費用會涵蓋不少工序層面。而製作年報大約需時三個月,一般流程係印刷商會收到上市公司嘅基本資料,傾好設計概念後,就會進行編製、印刷等工序,當臨近埋版時期,我哋更會實行24小時輪更制,因為年報內容嘅更改次數可以多達數百次,人手一定要充足。

涉財務機密員工要避嫌

彩兒: 咁你哋幫上市公司做年報,咪預先知道好多機密嘅財務資料?

毛: 所以我哋會同上市公司簽署保密協議文件,以確保所有資料不會外洩,亦會要求相關同事喺某段時間之前,唔可以買入相關股票以避嫌疑。另我哋亦已取得管理體系認證如ISO9001及ISO27001,以加強客戶嘅信心。

高妹:講真,散戶就唔多睇年報嘅!其實上市公司高層對製作年報有咩睇法o架?

毛: 一本年報可以話係代表一間上市公司嘅形象和信譽,近幾年我發現客戶對年報設計愈來愈重視,亦願意投放更多金錢喺設計及排版上,一方面希望吸引及方便股東去閱讀年報內容,另外就是希望透過年報設計去帶出公司所渴望傳達出去嘅故事,如經營理念、對公司股東嘅承諾、社會責任等訊息。 

設計變潮谷企業形象

彩兒: 我知道近年你哋設計嘅年報,其中有啲獲得「ARC Awards榮譽年報」獎項。其實廿年前同廿年後嘅年報設計有咩唔同呀?

毛: 廿年前嘅年報基本上唔會有咩設計元素,排版乾淨利落就可,功能性較強,總之以準確傳達企業資訊為主;但今天不少管理層都希望透過年報去讓股東更加認識公司,令年報設計不再局限於傳統標準模式,他們開始傾向選擇比較大膽新穎嘅設計和包裝,從而有助推廣企業形象,讓股東留下深刻印象。

高妹: 當然一份年報整得好好睇睇,散戶自然比較有心閱讀。不過計我話,上市公司記得整靚份年報之餘,最好整靚埋個股價,咁就大家都快樂喇!

TOPPAN曾負責印刷的金融機構2011年年報

友邦保險(01299)

中銀香港(02388)

港交所(00388)

思捷環球(00330)

上網睇有乜分別﹖

彩兒: 上市公司啲年報咁厚,仲話印刷費至平都要20萬元。如股東想要年報的話,咁使唔使畀錢㗎?

高妹: 放心喇!上市公司係有責任向其股東寄發年報,亦唔會向股東收取任何費用,股東更可因應個人需要,揀取中文或英文嘅電子或印刷版本嘅年報。

彩兒: 雖然有部分年報都幾靚,不過我睇完又唔會儲起,其實有無得上網睇先?

高妹:無論年報、中期報告抑或財務報 告,呢啲資料都會喺港交所嘅「披露易」網站或創業板網站供大家查閱,而有關文件更需載於上市公司嘅網站至少五年,所以你有大把時間可以慢慢研究研究喇!

彩兒: 輪到你放心喇!我咁聰明,睇年報易過借火喇!

(高妹)(彩兒)

若有料報畀高妹同彩兒或有嘢問,可電郵money.biz@opg.com.hk

「Money18免費即秒股票報價網站」現推出8升級功能,財經資訊,實時實發!