特首啱啱發表完施政報告，社會上唔同嘅社群都有啲唔同嘅迴響，例如房屋政策、土地政策等。不過，Prof. J覺得既然大環境嘅步伐唔同咗，我哋都要適當調整下自己，先可以與時並進！
睇番一啲生活數據，就發現時代條件唔同咗，有好多舊嘅想法都隨之而改變。就好似新婚生活易（ESDlife）網站舊年就進行咗「結婚消費調查」，訪問咗喺二○一二至一四年之間結婚嘅1,768對新人，其中95%受訪者希望婚後買樓自住，但有57%新人就坦承因為銀彈有限，解決住屋問題已經成為結婚嘅最大難題，而有26%受訪者亦表示婚後會繼續同屋企人住。
相信有好多朋友都有「成家立室」嘅想法，結婚都係想組織小家庭，有個甜蜜小窩。但私樓樓價喺過去四年升咗84%，上車盤嘅細單位更升超過九成，擺得酒嚟又要諗首期，所以「公屋新人」數字亦持續上升。由○九年只有7%到舊年18%，升幅達157%；而住村屋同居屋嘅就有24%，而只有56%受訪者住得起私樓，比以往大跌兩成。連深水埗80呎超豪劏房月租都要六千幾蚊，似乎「有樓先結」已經變得唔現實。
其實結婚係因為雙方感情昇華去另一個階段，咁冇樓都結得啫，無謂畀個框框限住。因此多咗未上到車嘅朋友就租住樓先，婚後租樓嘅新人喺過去四年飆升10%到43%。呢啲就係因為環境唔同咗，思想同行為跟住改變。其實廿一世紀，Prof. J發現中港男女喺求愛、理財、上車入市以及健康生活等方面都有新思維，令佢哋嘅好年華繼續盛放。
香港大學電子金融服務榮譽助理教授 徐燦傑