華人飲食收購權益
事關上個月頭開始停牌嘅華人飲食（08272）前日就公布，話公司上個月訂立一份協議，將會認購由一個特別目的投資工具發行嘅可換股債券，而呢個投資工具就會購入福臨門嘅大部分股權。
福臨門喺一九四八年由名廚徐福全成立，當時叫福記，五三年改名做福臨門。福臨門嘅富豪熟客可謂「粒粒皆星」，甚至佢哋下一代都跟埋佢哋做咗熟客，部分富豪更加已經幫襯咗四代。福臨門初期就以做到會出名，依家都有做，不過就只係向八至十個熟客提供。
福臨門近年都出現過家族糾紛，最終以五哥徐沛鈞買晒七哥徐維鈞手上嘅股份作結，掃走陰霾後，依家又再有新發展，絲絲就希望佢哋可以大展鴻圖啦！