內房老闆點睇樓市興旺，除咗每年定落嘅銷售指標之外，原來員工假期長短都係指標。恒大地產（03333）就親身示範咗。
話說每年農曆新年，一般內地公司都會趁春節放員工一個長啲嘅假期，等佢哋可以返鄉下同家人團聚。恒大老友同絲絲講，由於舊年老闆許家印都預咗頭嗰幾個月內地個樓市環境唔會好，既然無咩做，所以大部分員工春節都放咗成20日假。今年就好唔同喇，老友話今年只有12日假期，比起舊年足足少咗成8日。
雖然話舊年開始嘅時候做得唔係咁好，不過恒大全年都做咗923.2億元人仔生意，繼續係上市內房之冠，而絲絲都覺得佢哋係應該快啲開工，事關今年恒大嘅銷售目標已經上千億人仔，恒大老友都話有「啲啲」壓力。
話時話，恒大前日以每股4.35元配股，股價尋日即刻跌超過7%，仲跌穿埋個配股價，券商冇有怕，摩通話雖然配股會攤薄每股盈利，但可降低負債同融資成本，更相信恒大集資後會繼續補充土儲。