Market Insight：中興聯想 有望突圍

昨日市況值得關注是，空軍靜靜起革命，沽空佔成交比例連升三日，去到9.1%，是一個月以來第二高紀錄，睇嚟好友要顯出更大決心，大市先有機會更上一層樓。

特首施政報告，成為全城焦點，簡單講招數包括加快樓花預售、未來三至四年提供6.7萬個新居屋單位，未來五年新增10萬公屋。簡化樓花預售程序，變相透過提早賣樓，透支供應數字，措施或令市民安心一點，可是近期將軍澳新樓盤入場費1,200萬至1,600萬元，私樓樓價與市民購買力愈走愈遠是事實。再者地產商並非開善堂，賣長期樓花唔等於會平，對壓抑樓價作用應該有限。

放大圖片

放大圖片

增公屋供應最實際

公營房屋方面，古勝一向唔信居屋能解決中產上車困局，主要係定價始終私樓掛鈎，如果未來兩三年新樓閒閒地炒到兩、三萬蚊呎，就算打七折，要買亦唔容易，除非政府明言居屋呎價定出上限，例如5,000元，不過咁做隨時連細價私樓市場都拖冧，代價好大。本來最實際係增加公屋供應，至少無殼族能夠有瓦遮頭，五年10萬個單位供應計劃，睇落較現時平均萬四至萬五個一年，供應量有所上升，不過，細看原來包括每年要「回收」7,000個濫用公屋單位，實際增加數字唔多，廿萬排緊隊上樓的，睇怕都要繼續做住長頸鹿。

前晚，彰顯美國國力的科技股龍頭蘋果公司（Apple Inc），股價跌至485美元大半年低位，自去年九月在705美元見頂後，一季多時間跌掉三成一，市值蒸發2,065億美元，相等於1.6萬億港元，即係成間建行（00939）唔見咗。

蘋果公司陷入困境

睇到一份報告，有分析員認為現時是最難評定蘋果公司前途一刻，主要由於九七年Steve Jobs重掌蘋果公司後，由iPod、Macintosh電腦，以至空前成功的智能手機iPhone，每推出一項新產品，都做到風靡全球用家，一路順風順水。直到近期iPhone 5銷情熱度稍減，屏幕呎吋靈活性上故步自封，結果被南韓三星奪去最暢銷智能手機一哥之位，蘋果公司要打逆境波，令市場有點擔心。

有人埋怨新掌舵人Tim Cook，查實都唔怪得晒佢，教主臨終前出版的回憶錄，講過蘋果公司應該不惜一切，耗用所有資源摧毀Google開發的手機軟件平台Andriod。時至今日，君可見三星坐大，OEM及ODM智能手機百花齊放，Nokia斯人獨憔，完全都係拜這套手機軟件，滲透率與日俱增所致。

蘋果公司未能殺敵於微時，近日Andriod市佔率已超越蘋果IOS，不少投資者對飲蘋果奶水，相關零部件供應開始失去耐性，富士康（02038）、瑞聲科技（02018）暫時都係小心為上。至於蘋果公司失勢對於那類股份有利？勉強想到內地兩間Andriod手機生產商中興通訊（00763）及聯想集團（00992），可惜兩者手機生產收入佔比有限。最後一提下周三（23日）蘋果公司出季度業績，果迷及揸了相關股份人士要多留意。

流感高峰利醫藥股

上月中，北京出台《北京市空氣重污染日應急方案（暫行）》，沒想到一個月未到，北京市就首次啟動應急方案，市內多家污染物排放較高嘅工業企業須停工或減產，三成公車按規定停駛。

空氣污染嚴重，加埋時值流感高峰期，聽講市內唔少人感冒同氣管炎，上月底至本月六日，北京市便有兩名病人因患上甲型H1N1流感已死亡。預期流感高峰期尚會維持一段時間，市民叫苦，但醫藥行業卻處旺季，昨日見隻神威藥業（02877）炒起，創52周高位14.84元，收報14.4元，升5.57%，成交3,809萬元，短線大成交升穿15元關，下兩個阻力分別喺15.8元及16.7元，10日線支持在13.5元。

古勝