股票市場冇包生仔，印度可能打破呢個定律。印度嘅證券監管機構諗咗條絕橋，如果隻新股上市冇耐就跌得勁嘅話，大股東要向投資者回水！佢哋出呢個「辣招」，皆因當地新股市場嘅熱辣辣程度，同印度咖喱一樣有得揮，但通常好快碌番晒落嚟，散戶唔係跌傷就係跌死。
呢條橋嘅爭議性真係好大，但監管機構諗到咁辣嘅招數，都係因為新股炒風太過猖狂，唔少新股第一日上市閒閒哋升成倍，跟住就跌晒，已經畀人質疑係操控引人「落搭」，投資者都開始冇咩信心。監管機構嘅構思係，如果隻新股上市三個月內，大市唔跌但股價跌多過兩成嘅話，大股東要自己科水回購小股東股份。咁個市跌嘅話點計先？如果股價跌多過大市二十個百分點，大股東一樣要回水。
不過都唔係冇限制嘅，回水嘅錢最多只係集資額嘅5%，每人就最多5萬盧比（約7,132港元）。呢個構思對新股投資者梗係好事啦，但會唔會落實就未有決定嘞！其實印度監管當局之前已經出咗唔少招數，好似新股上市十日內唔畀炒即日鮮咁。如果出埋回水辣招，睇怕真係全球新股市場嘅先驅嘞！