絲絲講場：萬邦鍾明輝92歲做董事
如果講年紀最大嘅執行董事，大家可能想起「六叔」邵逸夫，不過佢已喺二○一○年（即係佢101歲果年）退任為非執董。依家年紀最大嘅執董，應該要數現年92歲嘅萬邦投資（00158）鍾明輝嘞，連主席「彤叔」鄭裕彤都要細佢5歲，所謂「家有一老，如有一寶」，萬邦都保留咗唔少長者美德。
鍾明輝係萬邦嘅創辦人之一，佢同彤叔一齊都係六七年十二月出任執董，連絲絲都未出世，佢兩位公子鍾賢書、鍾慧書依家都年過六旬，分別出任萬邦嘅執董同非執董。全個董事會平均年齡係73.6歲，已遠超法定退休年齡，年紀最細嗰個叫阮錫明，係一位55歲嘅會計師。執董同非執董每年各收取8萬元董事袍金，真係唔算多。鍾明輝年紀雖然大，但上個財年七次董事會，佢只係缺席過一次。
待小股東如老朋友
講開萬邦好多人可能會記得，佢哋差唔多每年股東大會後都喺中環某大酒家宴請股東食餐勁，萬邦上年AGM之後就擺咗十幾圍請股東食盆菜。不過都唔夠一○年之前勁，連續好多年都有魚翅鮑魚，諗起都流口水。
點解萬邦開AGM可以咁豪？絲絲估計，皆因佢哋小股東唔多，而且好長情，管理層見到小股東就好似見到老朋友一樣。萬邦主業係靠中環萬邦行同金利商業大廈兩幢樓收租，非常穩陣。經常都有人問萬邦會唔會私有化或者賣殼，但董事們都話唔會。唔玩財技，專注老本行，後生一輩真係好難做得到o架！