一二年新股表現真係麻麻哋，慘遭滑鐵盧嘅個案都唔少，只不過好少曝過光。金占士早前聽到其中一個case，因為拖遲咗上市，搞到盤數現晒形，最後畀聯交所否決上市。好在上唔到市，否則散戶可能有損失。
間公司做家居用品，喺香港都好出名，標榜歐洲進口貨，時不時會搞吓開倉清吓貨，一般人覺得佢形象高檔，利潤應該唔錯，所以佢過去三年嘅盈利紀錄其實都達標，點知因為市況同技術因素一拖拖到下半年至入表，咁就要開埋上半年條數畀人睇，點知唔開由自可，一開嚇親人。
咁大間公司舊年頭三季盈利得一球，主要因為市況差，毛利下跌，又要為存貨撇帳，而且仲被發現佢好多店舖租約大部分今年到期，擔心佢喺毛利大跌下，兼要受高租金壓力，經營狀況因此備受質疑，最終被打回頭，應該「永不超生」。
新股上市後一年盈利暴跌，然後股價大瀉累死小股民嘅事件好常見，公司管理層往往掌握咗外人無法預知嘅情況，真係要靠上市委員會呢班守門人，唔單只要睇過往紀錄，仲要行多步，預示埋將來可能發生嘅不利環境。
金占士