Market Insight：富士康 翻身有望

港股昨日開市後自動波愈升愈有，古勝搵外資行老友問，佢話唔少buy side芬佬仲放緊假未開爐，睇見期指可以裂口開高之後，難怪沿途阻力唔大，愈挾愈誇張，開市價22,852點已經唔算好低，仲可以即市推多470點，最高曾見23,322點，直到收市前半小時，好友先至肯鳴金收兵，似乎係對未來兩日更多芬佬將陸續歸位，開始減磅獲利鋪定後路。

美國一○年推QE2，將恒指推到24,988點海嘯後新高，之後大半年時間，港股只能在高位22,123至24,468點之區間橫行，三頂派貨後，再借歐債危機於一一年十月，跌至16,170點嘅中期低位。今次大市再次重遊高地，昨日恒指首次升至高位蟹貨區中軸23,295點樓上。

今年聚焦二三線股

昨日的升市，的確比古勝預計更輕鬆，展望短期資金持續流入港元區，更重要是，內地經濟及A股轉角市，已確認於去年第四季出現，恒指見兩萬五點應不是遙不可及，今年上半年達標的機會唔細。不過，去年恒指累積兩成二升幅，比唔少投行預測優異，全賴一線重磅藍籌跑贏大市帶動，隨着這類股份估值與二三線股拉闊，相信上半年好大機會是細價及中型股的天下。

放大圖片

放大圖片

國統局公布十二月中國製造業採購經理指數（PMI）見50.6，是連續三個月高於50盛衰分界，而滙豐中國十二月PMI終值也創十九個月高位見51.5，在在顯示無論大型國企及中小型民企，對短期經濟展望也確實係頗為樂觀。

另一較少提的數據，十二月內地鋼鐵行業PMI，按月大升6.3個百分點見55.5，主要反映訂單需求的新訂單指數，更誇張抽升13.5個百分點見60，兩個數字分別創7及22個月新高。有分析員認為，當中除季節性因素影響外，內地鋼材市場經歷近兩年慘淡市況，在今年基建投資增加、鋼材價格低位反彈的預期下，需求開始明顯增加，馬鋼（00323）及鞍鋼（00347）目前市帳率分別為0.58及0.73倍，與鋼鐵股周期開始復甦時的0.8至0.9倍仍有距離，短期內火鳳凰重生的故事，值得繼續捧場。

至於去年大落後的電訊設備股，踏入一三年，中興通訊（00763）成交及股價見明顯突破，昨日升穿十月嘅高位13.5元，升0.88元收報13.94元，確認係擺脫一浪低於一浪的中期調整。

4G概念帶旺中興

去年內地電訊設備股被忽視，一來幾間電訊商3G固定投資過了高峰期，其次歐洲及中東訂單受歐債危機影響，未達預期。

展望今年，內地開始部署推4G，中興是必然之選，而內地3G滲透率近兩成，中興也能受惠中低檔手機的需求上升。

聯想估值未盡反映

中移（00941）好可能投資小蜂窩機站彌補TD網的缺陷，京信通信（02342）會是冷門之選，而智能手機業務高速增長的聯想集團（00992），目前僅得PC股嘅估值，可以說是蔗渣價錢燒鵝味道，未必有強勁升勢，但勝在穩陣。

最後不得不提富士康（02038），去年一連串產能重整、削減存貨等一次性因素，上市以來第一次負毛利率，去年中期勁蝕2.26億美元，唔少大行對去年下半年大逆轉流於觀望。不過，銀紙唔識呃人，去年十一月富士康股價異動，由2.73元抽升至4.2元七個月高位後，一直以橫行代替調整，擺出一幅跌唔落姿態。

中動向啱短炒一轉

現價一三年市帳率1倍左右，假如最壞情況在去年上半年過咗，亦應有博反彈嘅條件，尤其是綜合預測一二年蝕2.05億美元，分析員估計去年下半年只賺2,700萬美元，預測保守，得唔得要到三月底業績至揭盅，但以目前形勢，再向上炒多浸等出業績機會唔細。

舊年盈警股無運行，今年或許可以否極泰來，事關一、二線股經已累積一定升幅，游資炒落後，轉攻盈警股，皆因舊年比較基數低，今年業務只要回穩或略有起色，都唔愁炒作藉口。古勝昨日就見到體育用品股普遍異動，就好似李寧（02331）、安踏體育（02020）、中國動向（03818）、特步國際（01368）及匹克體育（01968）升幅介乎3至11%。其中中動向股價表現相對滯後，昨日一支大陽燭慶新年，睇嚟呢轉有勢叩1.3元關樓上。

古勝