除夕日港股先跌後回順，收市微跌9點，報22,656點，全日高低位做22,698點及22,566點，即市波幅132點，半日主板成交287億元，氣氛唔錯。美國一度疑陷墮崖危機，道指上周五急跌，但一如市場所估計，兩黨最終達成協議，在元旦前帶來好消息，道指拗腰彈。
恒指自上月中首次升穿22,500點後，底部緩緩上移，淡友收手，上周五恒熊總街貨只有18.47億份，相當於三千多張對沖期指，單日增加8,900萬份，同日牛證總街貨54.22億份，當日減少逾2億份街貨。近周，牛證街貨居高不下，但期間指數變動唔大，牛證賺不了多少，熊證亦無太大傷亡。
元旦假期前衍生工具市場淡到無眼睇，牛熊證周一成交12.92億元，窩輪成交17.66億元，兩者共佔主板成交10.6%，相信今日回來後，情況可逐步改善，股友埋位，重定新一年策略。
滬綜指一二年由低位反彈一成六，全年累升3%，最新報2,269點，但都係扭轉了近兩年的跌勢，剛從低谷而起。內險股受惠經濟見底，A股轉勢，周一發威，國壽（02628）最靚仔，升3%，相關窩輪排個股成交榜的第三位，僅次於滙控（00005）及華夏滬深三百（03188）。
美國免除了急速墮崖之險，港股ADR價格大升，假後將現另一輪炒作，要睇位定上落，可重投牛熊市場，留意恒指好倉，恒指大和牛（63870）今年五月三十日到期，收回點數20,800點，槓桿比率約11倍。
Handsome哥