絲絲講場：按證劉怡翔 臨別晒靚相
按揭證券公司總裁劉怡翔（James）入主按證八年，做埋呢幾日就退休，雖然未有計劃，但係玩咗攝影多年嘅佢就想去內地、南美同東北三省雪鄉影相。尋日約埋絲絲一班老友聚一聚，James更加拎晒佢喺韓國、川藏、約旦同新疆攝影嘅四大相冊出嚟同大家分享。
James係九三年金管局「開局元老」之一，管過貨幣政策、聯匯制度、金融基建等等，○四年開始做按證總裁，近排睇返過去啲相，先知原來做咗咁耐，仲話以前返工時好想放假，以後就日日有得放嘞。
推新產品自覺成功
喺國金返工咁多年，James都話有啲唔捨得，仲回首當年剛剛嚟按證掌舵時，都要時間磨合，因為之前喺金管局係以央行角色同思維做嘢，而按證係用商業模式營運，不過睇住按證產品近年多元化又覺得好成功。
為咗安老按揭同小型貸款，James真係推銷不遺餘力，三句不離新產品，話按證目的無變，但依家已經唔止服務銀行，仲服務埋長者同中小企，近日連中銀香港（02388）同南商都加入埋小型貸款行列，可以話係畫咗圓滿嘅句號啦。
大讚李令翔係老手
至於即將接任總裁嘅李令翔（Raymond），尋日亦同James喺按證門口影張靚相，絲絲當係簡單交接儀式啦。
Raymond曾經處理過存保制同雷曼迷債等事件，James仲大讚Raymond係「老手」，肯定會做得好好！
余詩韻