證監會原本喺中環有兩個辦公室，除咗「大本營」遮打大廈外，另一個喺李寶椿大廈。證監會喺李寶椿大廈嘅office租約早已喺今年到期，員工早已率先搬咗入長江中心。至於「大本營」遮打大廈辦公室，明年租約亦到期。所以證監會由明年初開始，會陸續將員工轉移至長江中心。
新office人均面積縮
不過，絲絲聽聞「搬竇」後，證監會平均每人所佔用嘅面積竟然會較依家為少！原因係證監會近年加咗唔少人手。睇番證監會最新嘅季報，截至今年九月底，員工由去年同期嘅580名增加至647名，足足增加咗11%。不過由於今年成交低迷，截至今年九月底止三個月，證監會嘅盈餘得1,900萬元，相比去年同期有1.8億元盈餘，真係恍如隔世！