Market Insight:中國鋁業風險有限

放假期間A股狂升,滿以為港股復市能照辦煮碗的,恐怕失望到爆。昨日恒指復市,撇除開市頭段,全日波幅不足半百點。講到尾,唔少基金經理仲放緊長假,塘水滾塘魚下,昨日恒指主板成交416億元,全日市計係三個月以來最少。

恒指唔經唔覺,已經進入去年22,500至24,000點的後海嘯巨型蟹貨區,後市係龍係蛇?最樂觀睇怕都要等結算後,大孖沙陸續歸位先會見到真章。

中集集團(02039)B轉H叫好又叫座,順騰摸瓜,可以預期一三年,有更多半死不生的B股轉往H股市場。內地報道指內房龍頭深圳萬科,也準備B轉H,儘管係只聞樓梯響,而此前收購的殼股南聯地產(01036)昨日已炒高9%報13.08元,根據上市條例借殼後兩年不能進行大規模資產轉讓,而萬科管理層曾透露南聯主攻海外投資,同萬科專注內地物業發展會有明確分工,捧場客小心表錯情。

大昌行受惠弱日圓

今日兩隻新股登場,中國白銀集團(00815)及惠生工程(02236),昨兩股暗盤價都有些微進帳,古勝估計上市首兩三日表現應不及配售時,已獲大孖沙坐鎮的中集集團咁強勁。

安倍晉三出任日本首相,對振興經濟反通縮的強硬姿態,深得國民支持,近期日股強勢畢呈,圓匯則更跌至二十個月新低,多少反映金融市場傾向預期安倍向日本央行施壓,未來推行量寬的規模及力度,好可能比美國聯儲局主席伯南克有過之無不及。

一些弱勢圓匯之下有利的公司,短期內不妨倍加留意,古勝一號心水股係代理及經營內地汽車4S店的大昌行(01828),昨股價升穿十一月初高位8.21元,旗形整固完成爆發第二輪升浪,保守計今浪量度升幅應該可見8.9至9元關。

睇見統一企業(00220)以及康師傅(00322)由月初高位級級落,大致估到為數不少的大孖沙,選擇由高增長高估值股票,轉投價殘的周期性股份上,古勝第一時間想起已經連蝕四季,今年股價升得4.7%跑輸晒大市的中國鋁業(02600)。

業績可望逐步改善

在下從來唔鍾意中鋁,既然股市開始唔垃圾、唔落後唔炒,都惟有花小小時間睇吓。事實在過去二十個季度裏面,業績見紅就有十一季,「五更窮六更富」正好形容這間業績完全受工業需求周期影響的氧化鋁巨企。

過去四季皆蝕,時間上已超越海嘯後,○八年第四季至○九年第二季的三季見紅,累積蝕50.6億元人仔,同當年60.5億元人仔不相伯仲,較大的不同,係今次中央講明唔會有4萬億元基建投資救經濟,中鋁仲要捱幾耐?真係誰也說不準。

基本因素差,唔代表唔可以博反彈,尤其內地經濟開始走出谷底,氧化鋁價格及需求回升,未必令面對嚴重產能過剩的中鋁業績一百八十度逆轉,但蝕少啲,對估值處於歷史低位的中鋁,並非無可能。

過去十多年,中鋁市帳率兩次觸及0.6倍,一次是○一年上市後之後,另一次是○八年十月海嘯(歷史最低0.56倍),最近中鋁市帳率由九月低位0.6倍樓下,回升至0.69倍。比對○八年一次因為4萬億計劃,狂升至2.2倍,即使今次恐怕無咁瘋狂,但如果這周期股回歸到較接近市帳率歷史中位數1.77倍水平,現水平入市,中線風險有限,值博率卻頗高。

華藝炒上誘因明顯

過完聖誕,話咁快又係新年假期,唔使幾耐又到春節嘅時候。中國人喜慶節日唔少得一支好酒相伴,酒品既已進入銷售旺季,又可以睇實酒股。

早前被彤叔力沽、但有劉央接貨嘅銀基集團(00886),股價喺2.5元水平回穩;而最近亦涉足五糧液經銷業務嘅華藝礦業(00559),由於價細好炒,吸引炒家埋位,近周又再發力起步,股價升穿0.4元關未肯回頭,昨日高位曾見0.495元,最後收報0.455元,升幅3.4%,成交金額2,672萬元,睇勢抖氣過後,尚有力再試叩0.5元大關,守穩0.415元可小注。

古勝