不經不覺又到聖誕佳節！唔知各位朋友收到幾多聖誕禮物呢？絲絲就知道有位賓卡（banker）朋友都收到份聖誕大禮，講緊嘅係渣打集團（02888）嘅主席莊貝思（John Peace），佢份聖誕禮物認真厚禮喇！
渣打尋日公布，向莊貝思以零行使價授出有限制股份獎勵，涉及渣打15,782股普通股股份，按渣打昨日收市價196.6元計，莊貝思若即刻行使，便可袋三百多萬元。
用「大步檻過」嚟形容莊貝思真係最適合喇，事關渣打今年當真多風多雨，喺八月嘅時候畀美國紐約州金融服務局（DFS）突襲，指控集團協助洗黑錢，涉嫌同伊朗機構有業務往來，最後渣打要支付3.4億美元（約26.52億港元）和解費畀DFS，事件先至告一段落，睇嚟班渣打高層都要喺今個聖誕日，藉普天同慶嘅節日氣氛減吓壓喇！
余詩韻