港交所前晚（十九日）舉行一年一度嘅聯歡會，港交所行政總裁李小加完全冇受近期配股中委任無牌財務顧問一事影響，心情大好，更喺台上表演熱爆嘅ＰＳＹ招牌式舞步，為聯歡會掀起高潮，令台下員工熱血沸騰！
咪睇李小加平時一臉認真，開口埋口都要為人民幣國際化做準備，玩起上來都可以好投入同搞笑。佢喺台上表演ＰＳＹ金曲時，仲着咗套黃色西裝，又戴上假髮，絲絲雖然冇得喺現場親眼目睹，但諗起都忍唔住笑。
聯歡會當晚嘅主題係港交所技術革新計劃「領航星」，但聽聞跳舞至係「主菜」。除咗ＰＳＹ名曲外，李小加仲同班董事一齊大跳華爾茲，前主席夏佳理當晚有攜同太太出席，自然孖住太太一齊跳番隻舞，真係浪漫！
聯歡會喺會展舉行，聽聞喺場地中間搭咗個表演台，有啲紅磡體育館feel喎，唔怪得員工以為自己去咗聽演唱會。當晚仲有飲啤酒環節，飲得最多就有獎，港交所一年到晚工作一大籮，趁住年尾輕鬆吓，都好應該！
余詩韻