絲絲講場：上市商會生日超人親臨賀壽
上市公司商會尋日慶祝十歲生日，長實主席李嘉誠出席晚會時，就同大家預告聖誕佳節會離開香港。至於去邊，佢就大賣關子，唔講畀大家知。
聖誕節好多人都會互相送禮，逗下屋企人同朋友開心。絲絲好奇誠哥會送咩禮物畀啲孫仔孫女，不過佢唔肯透露，可能係想保持神秘感。對於近期政壇嘅風風雨雨同埋對樓市點睇，佢都唔肯講，但臨走前都有祝絲絲聖誕快樂！
商會：反思上市為乜
原本係商會生日嘅大日子，不過上市公司商會主席羅嘉瑞就有感而發，佢同絲絲講，近日英、美開始有言論，討論番公司上市嘅真正目的，佢希望呢股風氣可帶嚟香港，商會未來亦會喺呢方面多做推廣。
絲絲就覺得，由英、美開始「回歸基本」，真係幾諷刺，事關衍生工具由英美發起，仲發揮到淋漓盡致；好多高級管理層唔理公司「病危」，照樣領取大大筆花紅例子更是多得不可勝數，爛攤子就由番下手處理。依家真係時候好好反思！