王國安今次主要係針對局長上個禮拜喺立法會回應議員張華峰提案嘅言論。話說小經紀已被零佣金害到「雞毛鴨血」、「奄奄一息」，於是度咗條「佣金二級制」嘅橋出嚟，希望最低佣金可以「借屍還魂」。
公開信批評「輕率斷症」
點知局長上個禮拜開門見山咁話重推最低佣金係相當困難，亦都同促進市場競爭背道而馳，小經紀「自救」即時夢碎。
喺公開信上，王國安話從業員嘅收入現時一落千丈，十萬個家庭頓受影響，券商又陷倒閉邊緣，局長應該體察吓業界嘅困苦，唔應該閉門造車，「輕率斷症」，否則就係失信於民，有負於民。
佢封萬言書已交埋畀特首、財爺、同立法會全體議員，希望可以引起多啲人關注小經紀水深火熱嘅困境！