絲絲平日都好鍾意網上購物，仲發現網上賣嘅商品愈嚟愈多元化，家具、食品、連旅行套票都有得賣，遲下真係足不出戶都可以買齊生活所需用品！近日萬達集團董事長王健林就喺一二年CCTV經濟年度人物會上透露，同阿里巴巴董事會主席馬雲對賭，如果到咗二○年，電子商貿能夠喺中國零售市場佔50%份額，佢就畀一億馬雲，否則馬雲就要輸一億人民幣畀佢！
堅守傳統商業嘅王健林話，雖然依家電商好厲害，但佔全國銷售份額仍然比較小，要長啲時間先可以佔到一半以上份額。而且顧客鍾意炫耀式消費，即係走入人多嘅場所購物，所以商品需要喺公眾場合展示。佢仲話如果零售商將線上線下業務結合，一定會做得更好！
對於呢次對賭，馬雲就信心十足話電商一定會贏，因為電子商務已經推行咗一段時間，再唔係模式上嘅創新，而係一種生活方式嘅變革咁話。最近佢亦宣布淘寶同天貓交易額喺11月30號突破1萬億人民幣，係舊年全國社會消費品零售總額嘅5.4%，難怪佢咁牙擦啦！
之不過其實萬達都積極拓展緊電商大業，準備發展「智能廣場」，藉着電子商務將旗下嘅商業地產、酒店、旅遊、電影院線同連鎖百貨五大主營業務電子化，開設虛擬嘅線上商業綜合體。今次王健林同馬雲玩到咁大，絲絲真係好想快啲知道二○年會係咩景況，同埋最後邊個要找數！
余詩韻